الشرح غدا بعون الله
في هدا القسم

مجموعة استفسارات عن adsl
 

السلام عليكم
مادمان واضح من موضوعك انك خبير ماشاءالله تبارك الرحمن عليك ...انا عندي واي ماكس نوع zyxel او الخلاط (الترمس) المهم المشكله انه لما نعلق النت اللامبة تقعد تطفى و تولع متع التغطية شفت الحل لهذه المشكلة لقيته انه تعديل للباندويدث والترددات ..لكن الكارثة بعد ما شفت الصور اللي انت مرفقهم يبارك فيك, لقيت بعد ما ندخل علي wan configuration انه ال Tabs اللي اللي بجنب internet connection اللي هما wimax configuration و traffic redirect غير موجودات يعني ما نقدر ندخل علي اي وحدة منهم باش نعدل لانهم ببساطة مش ظاهرين ..فلو عندك فكرة او اي واحد من الشباب يدلنا علي الحل
وبارك الله فيكم مقدما

اهلا بيك اخي الكريم
وشكرا على كلامك الجميل
الامبة لما تقدع تنطفى وتشلع وفيه تغطية متلا 3 لامبات والاخيرة ما فيش
تقعد غير تنطفى وتشلع يعني احتمال كبير يكون 10 قيقا تموا
او اليوزر نيم والباسورد اللي مدخلهم غلط , يقعد المودم يحاول يتصل بالسيرفر لكن يرد عليه السيرفر يقوله بانه غلط لدلك تقعد تشعل وتنطفى وبعدين ينطفوا حتى متاع التغطية ويعاود يتصل مرة تانية
تقدر تشوف رصيدك من الموقع او تتصل بالرقم 116 على الارضي
يقولك للغة العربية اضغط رقم 1
أضغط 1
يقولك ادخل رقم العقد ( دخل الرقم الطويل اللي بدايته 20000200 وكمل باقي الارقام زي اللي موجود في العقد )
بعدين يقولك أدخل الرقم السري ( دخل اخر اربعة ارقام من البطاقة الشخصية او الجواز سفر تلقاهم في الصفحة الاولى من العقد والافضل في الصفحة الثانية تلقاهم فوق اربعة ارقام )
بعدين يبدى يتكلم متاع البدالة
اضغط رقم 2
بعدها أضغط رقم 2 مرة تانية ( يقولك رصيدك ..........)كدا قيقا بايت
ولو قالك رصيدك صفر يعني تموا القيقات قبل ما يتم شهرك

او ما فيش يوزر نيم وباسورد يعني احتمال حد دار للجهاز ريسيت وامتسحوا البيانات اللي فيه
او درت أبديت وامتسحوا البيانات اللي فيه

اما على الترافيك او البانديث
دير صورة وارفقها في الموضوع
ودير صورة من الواي ماكس اللي عندك
لانه مروا عليا هلبا حتى الخلاط في الشكل فيه 2 نفس كل شي تقريبا ماعدى السوفت وير وفي الجهاز من اللبرة واحد عليه صورة LTT والثاني عليه صورة شركة Zyxel

ان شاء الله قدرت نفيدك لو ما عرفتش كيف
بره للوكيل متاع LTT اللي في قرقارش رح تلقاني غادي بحدى قاعة الشعب (دنيا المعلومات)

اهلين خوي واسف على التاخير على الرد
لاني ما شفتاش الا اليوم

مش مشكلة بعون الله رح نديرلك شرح
في اقرب فرصة
بس اللي نعرفه في الجهاز هدا جاية معاه ورقة التعليمات كيف تدير
وباسورد الوايرليس موجود في خلف الجهاز
بس مزبوط مش مدايرين كيف تغير الباسورد الوايرليس

تحياتي

مادمان والله تعبتك معاي سامحني ...مشكور قبل كل شي عالرد لانه حسب حالة المنتدى متوقعتش الرد يجي بهالسرعة
أخي بالنسبة للرصيد تمام وانا ماشكيت الا لأنه فيه مشكلة احرف من إنتهاء الرصيد
اني اللي عندي zyxel اللي مكتوبة عليه اسم الشركة الاصلية يعني zyxel لما تعلقه فيه اللامبة اللي فوق الانتينا تشعل و تطفى واللامبات من غيره فيه زوز تابتات يشعلو وحدة متع الباور والتانية متع الشبكة رقم 1 غيره مايشعل شي
بالنسبة للإعدادات اهو ارفقتلك صورة
لكن فيه واحد قالي انه المشكلة ممكن من الفيرموير متعه لاني منزل الجديد الاخير يعني ..وفيه الضبط اعتقد مدايرينه توماتيكي متع البانويدث والترددات باهي ...لذا ممكن واعتقد انه الحل حيكون في الفيرموير القديم رقم 2.1 أعتقد
كان عندك الفيرموير الاخير والله تعمل فيا معروف مش عادي بكل لو ترفعه لاني قلبت الدنيا ومالقيتاش
واهو صورتين وانت شوف
http://img815.imageshack.us/img815/9144/10471228.jpg
-
http://img338.imageshack.us/img338/6832/89671557.jpg

اهلا اخي الكريم
كويس انك ارفقت الصور
رغم من انه عطلت معاك
لكن مش مشكلة
المهم
=================
كلام صديقك اللي قالك من الفريم وير مزبوط لانه فيه جهاز جاني قبل نفس مشكلتك
وكان من الفريم وير
لانه جهازك من الدفعة الاولى القديمة
====================
السوفت وير اللي عندك V3.60(BQD.3)E0 | 09/29/2009
السوفت وير اللي عندي V3.60(BQD.3)E0 | 10/28/2009
تقريبا شهر بينهم
بس الباين فيه تغييرات صايرة اللي تخلي الجهاز يتصل بالسيرفر بكفأة

لو تبي الفريم وير الاخير نزله من هنا
تنزيل الفريم وير لازم يكون متصل بالجهاز بالكابل ويبي صبر
مرات يفعد 20 دقيقة او اكثر
====================

لاحظت الباسورد عندك متكونة من 9 ارقام او حروف
الباين انه الباسورد يبدأ ب 103
تقريبا
ولو كانت تبدأ بــ 20000200
معناها الباسورد ناقصة اللي حاطها في الجهاز
==============
ارجو منك التجربة
والرد ان كانت المعلومات أفادتك ام لا .
ولو لقيت غير هدا قولنا على الحل اللي لقيته انت لو مش مدكور هنا


حتى يستفيد اللي بعدك

تحياتي

والله عارف شني منقولك ...ربي يجازيك كل خير ...بالنسبة للرقم السري هو قاعد رقم العقد يبدا ب 100 ...المهم حتى اني قلت اكيد من الفيرموير الانه زي ما قتلك الاعدادات مهناش لانها معدلينها توماتيك...ان شاءالله غير الفريموير الجديد اللي اعطيتهولي تكون ظاهرة ...طبعا زي ماقتلك متصل بالمدار دايل اب وسرعة والله ما نحكيلك (يعاني الحي والله ) وبالنسبة للتجربة اكيد تكون غدوة في ولد صاحبي عنده الايكولايف ناخده منه وان شاءالله تزبط الدنيا
وغدوة اكيد تلقى ردي بخصوص الانطباعات او الحالة شن صار فيها و ان شاءالله يكون هالمنتدى للتعلم والتعارف وتبادل الخبرات بين خوتنا الليبيين ..بالنسبة ليا يا مادمان هدا المنتدى الليبي اللي ندور فيه ولقيته..هيجنا عند الخليج لين عيينا
ومنور ومليون شكر ليك...وغدوه لقاءنا ان شاءالله
سلام الله عليكم
(((( لحظة اخ مادمان ,,,الفريموير اللي انت مستعمله مكتوب بتاريخ :V3.60(BQD.3)E0 | 10/28/2009 اللي اعطيتهولي من الموقع متع ال ltt بتاريخ 2009/21/10.. لو كان قاعد عندك في الكمبيوتر تديرله ابلود للرابيد شير ..ملاحظة الجهاز اللي عندي راهو القديم اللي مكتوب عليه zyxel))

ايه الشي هدا مزبوط زي ما قلت
على الفريم وير
بس انا حاليا نخدم بالفريم وير اللي عندي وما فيشي اي مشاكل هدا علاش قتلك عليه اني نستخدم فيه توا
يعني لو عندك قبل هدا الفريم وير احتمال كبير يكون منه
وهو مش ديما ينزلوا في ابديت جديد كل مرة او كل سنة
يعني احتمال اليوم نزل الفريم وير الاخير في جهازي ونقولك شنو صار وشنو الفرق والتغيررات
غير عندي شوية حاجات نديرلها في داونلود وما نبيش نوقف الواي ماكس (ليونكس الاعجوبة + ليونكس يستخدم من قبل fbi) + ديسكات تعريفات الاجهزة + افلام وشوية مسلسلات


تحياتي اخي الكريم
وشكرا على الكلام الجميل والله فعلا يرفع الراس ويخلونا نعطوا اكثر واكثر

اهلين خوي مادمان..
اني اليوم نزلت الفيرموير وجربته ..والقصة قاعدة زي ماهي نفس الرقم متع الاصدار قاعد ونفس المكشلة واصلا الفيرموير اهوا اللي اعطيتهولي نزله الولد وجربه قبلي وهو نفسه يعني اللي نازل في الجهاز..هذا كانه نازل لانه الملف اللي بداخل الملف المضغوط يختلف عن اللي مكتوب عليه فهمت الملف المضغوط اسمه Firmware_Zyxel_205M_21.10.2009 والملف اللي في داخله اسمه MAX206M2_3.60(BQD.3)E0(20926) ؟؟؟ كيف منعرف انه هو نفس الفيرموير وهو الاسم مختلف
وكذلك طريقة الابديت تختلف عن ملف المساعدة اللي حاطاته ال ltt حيث انه الابديت يتم عن طريق الدوس مش عن طريق برنامج زي ما ظاهر في الملف الفلاشي متع ال ltt وكذلك ما عطلش التفلتيش متع اللامبات ممكن 15 دقيقة وقفت الاضاءة
من رأيي يا خوي انه لو عندك الفيرموير اللي قلت عليه انك ترفعه لي على موقع معين واني نزله أعتقد انه هذا يحل المشكلة
وسامحنا مرة تانية ...أخوك