منتدى ليبياأرس - بيت للشاعر المبدع السنوسى الحمرى من مدينة سبها

كونه ضاع ضاع...جريت وراه حد المستطاع
فراقه صار كونه ضاع ضاع

اتقول:-

كونه كان غالى = وكونه العهد ما يرضى بدالي
كونه حلم بيحقق امالى=وكونه هدف ما يقبل ضياع
وكونه نعز في قدره العالي=وكونه العند ما يحل النزاع
كونه أحداث ماكانن في بالى=كونه الأمر يحتاج اقتناع
وكونه البحر في مدا العالي=وكونه الصح تغيير الشراع
وكونه الجد مهوش تسالى=كونه الحزم مايبى قناع
وكونه طاح من برج العلالى =استخسر في نظرات الوداع

كونه ضاع ضاع...جريت وراه حد المستطاع
فراقه صار كونه ضاع ضاع

كونه ما قسم=وكونه ضاع عيشنى في هم
وكونه العقد من بعد التتظم=وكونه راح مابين الصباع
وكونه بكاس جرعني السم=وكونه لدغ من أشرس الفاع
وكونه قال وافقنا نعم =كونه بيه سلمنا انصياع
وكونه بعهد ما يوم التزم=كونه الحب ما يعنى إتباع
وكونه الحظ في لحظة برم=وكونه غرقت لامستا القاع
وكونه العزم ما يوم نهزم=إرادة صلب ليه خبرة وباع

كونه ضاع ضاع...جريت وراه حد المستطاع
فراقه صار كونه ضاع ضاع

كونه ما يعود=وكونه راح حازنا غرود
وكونه الغدر والأقسى الجحود=وكونه الشد من وجع الذراع
كونه الصبر را عنده حدود=وكونه الفرق في نوع الأوجاع
وكونه عشت أياما و سود=كونه لين قطعني قطاع
وكونه الخوف ديمه من الحسود=كونه الحسد من شين أطباع
وكونه الحب من يوم الوجود=كونه إحساس وجداني متاع
وكونه الصدق والقلب الودود= وكونه العفو من شيم الشجاع
وكونه العمرفى أيامه عدود= أنا سامحت واللي ضاع ضاع

كونه ضاع ضاع...جريت وراه حد المستطاع
فراقه صار كونه ضاع ضاع