بسم الله الرحمن الرحيم
السلام عليكم ورحمة الله وبركاته
اولا اني اسف علي الانقطاع علي المنتدي الفترة هذي كلها بس بجد كنت متابع جيد للمنتدي ..
ثانيا والموضوع الاهم اني فيه مواقف مرت عليا بعد تحرير طرابلس الحبيبة نرفزتني و بجد طلعتني عن طوري واعتقد ان اهم هذي المواقف صارلي في عين زارة بالقرب من مقبرة السدرة ؛ واللي صار كالاتي :-
طبعا بعد انقطاع الماء عن طرابلس اضطرينا انا نطلعوا من الحوش وامشينا لحوش عمي وقعدنا غادي لان فيه بئر المهم واني مقعمز قدام حوش عمي نشرب في فنجان قهوة في عقاب العشية ، وقفت عليا سيارة شفرليت بيضاء فيها شيباني وصار بيننا الاتي :-
الشيباني : انت ليش مقعمز هنا انت تسكن في اما حوش ؟؟
انا : نسكن في الحوش هذا واشرت علي حوش عمي
الشيباني : انت زليتني
انا : ايه زليتني
الشيباني : لعنة الله عليكم كلكم انتم وورفلة انتم السبب في دمار مصراتة الله لا تربحكم ( وسب لنا ديننا )
انا : التفت الي الجهة الاخري واني الدم يفور في دماغي
وقعد الشيباني يتكلم واني مش معبره ولاقايمه من ارضه المهم جاني من الجهة الاخري وقال : اني فلان بن فلان من بنغازي
انا : اني فلان بن فلان
الشيباني : خيرا انكلم فيك وانت مش معبرني ؟
انا : لان كلامك اعوج ونشهد بالله ان كلامك كله مردود عليك وما نيش قابل منه حتي كلمة ولولا انك في سن جدي كنت نعرف كيف نتصرف معاك
الشيباني : انت حرجت يا ليش سبيت زليتن ؟؟؟!!
انا : اكيد الناس اللي انت سبيتهم هادم هلي وناسي وعزوتي
الشيباني : لالا عادي حتي اني من سكان زليتن ونساباتي من زليتن وعادي نسب فيهم
انا : انفجرت بالغضب وقلتله لو كنت انت رضيت في نسابتك اني ما نرضي في ناسي وهلي اني سيدي هكي رباني
الشيباني : اهل زليتن هما اللي دخلوا الكتائب لمصراتة يعني هما السبب في اللي صار
انا : اسمع يا سي الحاج ريت حوشك هذا اللي قدامك هذا لو كان القذافي بيه قسما بالله يسوقك ( يضربك ) بالكف وبالمسواق ويخش لحوشك وما تقدر تقوله كلمة وهذا اللي صار لاغلب اهل زليتن وتربح رتزايد علينا ولا نزايدوا عليك
الشيباني : بارك الله فيك انك احترمت سني ونشهد بالله انك انسان محترم وباس علي راسي وقاللي سامحني
وهكي الشيباني امشي علي حاله بعد النقاش الحاد والاسلوب الجاف اللي هدرزنا بيه
وتوا بالله قولولي لما تجي وتسب مجموعة قبائل كان اغلبها مغلوب علي امره هذا شنو معناه بالله توا هذا مش شئ يحرق الدم .... استغفر الله العظيم واتوب اليه
وتوا نبي ارآئكم لو سمحتولي